"Kaffi aassaviuk?"
Ukiuni qulikkaani kingullerni inuiaqatigiit inooqatigiinnikkut kulturikkullu annertoorujussuarmik allannguuteqarnikuupput, inuiaqatigiinni isumaginninnikkut, ulluinnarnut, inuit pissusaannut, kinaassutsitsinnut akunnitsinnilu attaveqarnitsinnut allannguutaasumik.
Allannguutit ileqqutoqqatsinnik allannguinermik ilaqarput. Taamaakkaluartoq suliffeqarfinni Kalaallit Nunaanniittuni aqutsinerup iluani angutit arnallu atugaat suli naligiinngillat.
Ullumikkut suliffeqarfinni Kalaallit Nunaanniittuni arnat aqutsisutut atorfillit angutinit ikinneerarsuusut ilisimavarput. Angutit arnallu aqutsisutut atorfillit akornanni agguaqatigiinnerup sooq naligiinnginnera Kalaallit Nunaanni Naligiissitaanissamik Siunnersuisooqatigiinnit paasisaqarfiginissaa soqutigisaraarput
Kalaallit Nunaanni nalinginnaasumik sammisap uuma ilisimatusarfigineqarnissaa amigaatigaarput.
Nalunaarusiami siunertaq
Ineriartorneq pileraluartoq, Kalaallit Nunaanni suliffeqarfinni naligiissitaaneq amigarpoq. Naligiissitaanermut ajornartorsiutit suliffeqarfiup piumasaqaateqarnerani ersikkajupput, ilaatigullu aaqqissuussaanermut suleriutsinullu suiaassutsikkut naligiinngissitsinermik ingerlatitseqqiinermut attassiinnarnernullu tunngasarlutik. Suliffeqarfiit ilaannaanni naligiissitsineq aqutsisoqarnermi sammineqartarpoq, aqutsinermi aaqqissuussaanermilu pitsaasumi pingaarutilinnik oqariartuuteqarneq sulinermut, suliffeqarnermut, suliffiup suliffiullu avataani inuunerup ataqatigiinnerannut pingaaruteqaraluartoq. Nalunaarusiami angutit arnallu akornanni attaveqarneq sammineqarpoq, ajornartorsiulli suiaassutsimut sammivallaanngilaq, naligiissitsinerulli malitsigisaanik aaqqissuussaanermi assigiinngissitaarnerup inissaqartinneqarneranut atorluarneqarneranullu sammilluni. Nalunaarusiami Kalaallit Nunaanni suliffeqarfinni ajornartorsiutit aqutsisut tikkuagaat sammineqarput, sammisami oqallisigineqartariaqartut ineriartortikkumallugit.
Nalunaarusiap imaarisai apersuinernit aallaaveqarput, missuinermilu tasani Kalaallit Nunaanni suliffeqarfinni naligiissitaanerup qanoq sammineqarnera atorneqarneralu paasiniarneqarput. Suiaassutsimut tunngasut misigisat, suliffeqarfinni naligiinngittoqartillugu naligiissitaanermut ajornartorsiutinullu periarfissat takkuttartut, apersuinerni 15-iusuni, tassani arnat aqutsisutut atorfillit taavalu angutit aqutsisutut atorfillit arfinillit ataatsimut apersorneqarnerini sammineqarput.
Nalunaarusiaq una asserluunniit toorlugu atuaruk.
