“Piffissaq immikkuullarilluinnartoq” taagaangatsigu nuannersumut sammitittarparput, kisianni ulluni makkunani allarluinnarmut tunngasuuvoq, tassa Covid-19-ip tunillaassornerata kingunerisai pineqaramik. Covid-19-ip tunillaassornerani amerlanerpaajusugut angerlarsimavugut, aamma angerlarsimaffitsinni suliffitsinnilu pingaarnersiukkavut qanoq iliuuseqarfigisinnaanagit isiginnaaginnartariaqarsimallutigit. Nunarsuatsinni nunani amerlanerpaani inuiaqatigiit matusariaqalernerisa nalaanni amerlanerpaajusugut ulluinnarni suliassanik pilersaaruterpassuaqareerarluarpugut. Suup tungaanut ingerlanerluta ilisimavarput aamma ulluinnarni qanoq pisariaqarnerluta ilisimavarput. Taamaattoq virusip isaannatsinnik takusinnaanngisarput peqqutaalluni inuiaqatigiit tamavimmik unittoorfigaat allaanerusumillu pingaarnersiuilertariaqarluta. Atukkat ilisimanngisat atorpavut.
Tamatta angerlarsimaffitsinni suliffitsinnilu toqqissisimanartumik atugaqarnissatsinnut allatullu aaqqissuussaanermik ingerlatsinissatsinnut sulisitaavugut. Kalaallit Nunaanni Naligiissitaanissamut Siunnersuisoqatigiit suliaat pingaarutillit, soorlu 20. maaji 2020-mi nuna tamakkerlugu naligiissitaanissamut ullorititap malunnartinneqarnissaa aamma qanigisani persuttaasarneq pillugu nunat killiit isumasioqatigiisitsinissaat ukiamut tamarmik kinguartinneqarput.
Inuiaqatigiinni kulturi allanngorpoq. Sulinerit ingerlarngi allanngorput nunarsuarmioqatigiillu sinnerinut naleqqussagaallutik. Aqqutit nutaat ineriartortippavut, aamma digitali atorlugu ungasissumiit immitsinnut isigaluta aqqutissiuillutalu naapittarpugut. Piumassusissarinngisatsinnik allanngoriartornerup ingerlanerani inuiaqatigiitsinni sanngiiffigut nukittuffigullu suunersut pinngitsoorata paasiniartariaqalersimavagut. Siunitsinniipput sapiissuseqarluta nukittullutalu suliassagut annertuut isumagisassagut. Ajornartoorneq qaangeripput ilimaginngilara, ajornartoornerulli immikkoortua siulleq qaangeqqajaaleripput ilimagaara.
Ilaqutariiaani ernumanartortalinnik aamma pisoqarpoq. Ilaqutariit angerlarsimaffimminni mattuteqqapput, ilaqutariit persuttaaffiusareertut mattuteqqaneqarnermi nalaani imaannaanngitsunik kingunerlutsitsisinnaapput. Misilittakkammi naapertorlugit Covid-19-ip tunillaassornerata nalaani angerlarsimaffinni persuttaasarneq annertuseriarsimavoq. Meeqqat angajoqqaaminnit sumiginnagaasut pillugit nalunaarutiginnittarnerit ikileriarput, tamannalu eqqarsaatigiinnarlugu ajorluinnarpoq. Ajoraluartumik tupaallannartortaqanngilaq. Unammillernartut ajornartorsiutillu taakkuuinnarput, allatulli poortorneqarsimasutut illutik.
Allanngoriartortoqarpoq, tamattalu isumannaatsuunissarput toqqissisimanartumiinnissarpullu pingaaruteqarpoq. Suliffeqarfinni naleqqussarneq kisimi pissanngilaq, aammali angerlarsimaffinni. Ilaqutariit persuttaaffiusut pingaartumik eqqarsaatigisariaqarput. Toqqissisimanartumiinneq, timikkut tarnikkullu pilersitsiviusariaqarput. Ersarissunik maleruagassaqartitsinikkut ersarissuuneq eqqissisimanerlu pilersittariaqarput, qanillinaveersaarnikkullu qanilaarneq kinaluunniit persuttaanerup pissaanerani mattunneqartutut tigusarineqartutullu misiginnginniassammat pilersitsisoqartariaqarpoq.
Taamaammat persuttaanerup ajornartorsiutigineqarnera ukkatarineqassasoq nuna tamakkerlugu naalakkersuinermik suliaqartunut sakkortunerpaamik innersuussutigissavara. Covid-19-eqaraluarpat peqanngikkaluarpalluunniit, unammillernartut suli maaniipput persuttaanerlu akiorniarlugu naalakkersuinermik suliaqartunit ukkatarineqarnerulernissaa piffissanngorluinnarpoq.