Naligiissitaaneq tamanut atuuppoq

Naligiissitaaneq tamanut atuuppoq

Oqaatigineqartareersutut naligiissitaaneq tassaavoq arnat pisinnaatitaaffiisa periarfissaasalu qulakkeerneqarnissaanut assinganik angutit pisinnaatitaaffiisa periarfissaasalu qulakkeerneqarnissaanut tunngasuusoq.

Assersuutigalugu Naligiissitaanissamut Siunnersuisooqatigiit isumaat naapertorlugu angutit arnatulli meeqqaminnut angajoqqaajunissaminnut naligiimmik pisinnaatitaaffeqarput.

Uanga isumaga malillugu naartunermi erninermilu sulinngiffeqartarneq pillugu Inatsisartut inatsisaanni angutit assigiinngisinneqarput. Anaananngortussat erninissaq ullunik 14-inik sioqqutsillutik sulinngiffeqartitaasarput meeqqallu inunngoreernerata kingorna sapaatit-akunnerini 15-ini sulinngiffeqartitaasarlutik.

Ataataasut sapaatit-akunnerini pinngasuni sulinngiffeqartitaasarput – meeqqap inunngornerata kingorna sapaatit-akunneri 15-it iluini atugassaat. (Tamatuma saniatigut angajoqqaajusut tamarmik angajoqqaatut sulinngiffeqarsinnaatitaaneq sapaatit-akunneri 17-it avittarpaat.)

Aamma angajoqqaatut oqartussaassuseqalernissamut suliani angutit arnallu qimerlooraanni amerlanerpaat arnaasarput tamakkiisumik angajoqqaatut oqartussaassuseqalersinneqartartut.

Uanga isumaga naapertorlugu angajoqqaajulluarniaraanni angutaaneq arnaanerluunniit apeqqutaanngilaq. Taamaattumik isumaqarpungattaaq erninermi sulinngiffeqartarnermut tunngatillugu naligiinnerulernissaq Naligiissitaanissamut Siunnersuisooqatigiinnit sulissutigissallugu pisinnaatitaaffigineqarlunilu pisussaaffigineqartoq.

Kathrine Bødker, siulittaasoq.