#ArcticFeminism

#ArcticFeminism 

Arnat sulerisassanersut angutillu sulerisassanersut inuiaqatigiittut immikkut naatsorsuuteqartarnerput avaqqunneqarsinnaanngilaq.

Assersuutigalugu arnat amerlanerit perorsaasuuppata imaanngilaq aallaaviatigut perorsaasutut pikkorinnerusuusut. Imaaginnarpoq arnat angutinut sanilliullugit isumassuillaqqinnerusutut isigissagivut perorsarneqarnikuugatta.

Illit assersuutigalugu angutaaguit arnamut sanilliullutit periarfissaqarnerutitaavutit, soorluttaaq ammip qalipaataa, suminngaanneerneq suiaassuserlu apeqqutaalluni inuiaqatigiinni qanoq periarfissaqartitaanerit sunniuteqartartoq.

Arnanik illersuineq angusariaqarparput.

Arnanik illersuinermik pissuseqarnitsigut arnap “qanoq ittuusariaqarneranik” angutillu “qanoq ittuusariaqarneranik” eqqarsartariaatsitsinnik eqqarsalersitsisussaavoq tamaallu isigalugu nalinginnaasumik inuit ataasiakkaat “eqqortut” suunersut apeqqusersorsinnaallutigit.

Ullumikkut arnat angutillu akornanni naligiinnginnerup nassuerutiginissaanut akiornissaanullu arnanik illersuineq siunertaqarpoq.

Arnanik illersuineq tassaavoq qanoq ittoorusussuseqarnermik aalajangernissamut kiffaanngissuseqartitaaneq, aamma suiaassuseq apeqqutaatinnagu inuunermik qanoq ikkaluartumilluunniit nammineq toqqakkamik atuerusunneq.

Arnanik illersuinikkut qangatut eqqarsartariaatsip aporfilersuisuusup aserorsaataasup akiorneqarnissaa anguniarneqarpoq, aamma kikkuugaluaraanni, qanoq suiaassuseqaraluaraanni, sumiuugaluaraanni, suminngaanneeraluaraanni, qanoq suiaassuseqaraluaraanni, qanoq upperisaqaraluaraanni il. il. illersorneqarnissaq siunertaavoq.

Tamatta assigiimmik periarfissaqarlutalu pisinnaatitaaffeqassaagut.

Arnanik illersueriaaseqarnerit assigiinngitsorpassuupput, kisianni isummat pigiliutiinnakkat qaangerneqarnissaannut arnanik illersuinikkut tunngaviusumik anguniagaavoq, aammalu inuiaqatigiinni aaqqissuussaanitta angutinik arnanillu (ileqquusumik) isiginnittariaasitoqqatsinnik attassiuartarnitta allanngortinnissaat siunertarineqarpoq.