#Naliga

Assigiinngisitaartuunermi naligiissuuneq

Inuit assigiinnik tunngavissaqartinneqarlutik imaluunniit aallaaveqartinneqarlutik inunngorneq ajorput, inuillu inuunerminni toqqammavigisaat inummiit inummut assigiinngitsuusinnaapput. Ilaat inunngortarput ilaqutaqarlutik nukissanik ulikkaartuni, ilaat nukissakinnerusuni. Ilaat atuagarsornermut pikkorinnerusarput, allallu soorlu timersornermut, assassornermut imaluunniit eqqumiitsuliornermut pikkoriffeqarlutik. Pissutsit piviusut tassaapput, inuit tamatta ataasiakkaarluta immikkut ilisarnaateqarpugut.

Kisiannili inuttut tamatta naligiippugut.

Inuit kikkulluunniit inuit pisinnaatitaaffiinit illersorneqarput, soorlu; politikkikkut pisinnaatitaaffinnit, isumaginninnikkut kulturikkullu pisinnaatitaaffinnit, ammip qalipaataanik immikkoortitsinerit suulluunniit atuutsinnginnissaannit, arnanik immikkoortitsinerit suulluunniit atuutsinnginnissaannit, aamma inuit innarluutillit pisinnaatitaaffiinit.

Pisinnaatitaaffiit taakkartorneqartut inunnguusaapput annaaneqarsinnaanatillu, inunnullu tamanut atuutsinneqarlutik. Taamaakkaluartoq inoqarpoq inuiaqatigiit akornanni inissaqaratik misigisunik, aamma inoqarpoq tikilluaqqusaanngitsutut misigisunik. Pissutsit piviusut tassaapput, inoqarpoq namminneq qanoq iliuuseqarfigisinnaanngisaminnik assigiinngitsunik peqquteqartumik assigiinngisitsinermik misigititaasunik.

Inuppassuaqarpoq avataaniisinneqartunik, taakkulu ataatsimoortunut ilanngunneqarneq ajorput. Inuiaqatigiinnik naligiinnermik peqataatitsisumillu tunngaveqarluni pilersitsiniaraanni, ilungersuutigalugu suliniutiginissaa pisariaqarpoq, tassami nammineerluni takkukkunnanngilaq. Aamma sorpassuit sulissutigisariaqarput.

Peqataatsineq tassaaginnarpoq assigiinngisitaartunik akuersaarneq, inuillu ataasiakkaat assigiinngitsut inissaqartissinnaanerisigut akuersaarnerisigullu assigiinngisitaartuni nukiuvoq, ilaatigut akuersaarnermik ataqqinninnermillu pineqartussaallutik.

Naligiissitaanissamut Siunnersuisooqatigiit assigiinngisitaartuuneq eqinnaatsuunermik inullu assiinngitsut nukiannik isigineqarpoq.

“Tamat oqartussaaqataanerput, ataatsimuussuserput aamma assigiinngisitaartuunerput paarilluagassaraavut. Siullermik immitsinnut paarilluartussaavugut, tassami tamatta ikioqatigiittussaavugut”, taama oqarpoq Kalaallit Nunaanni Naligiissitaanissamut Siunnersuisooqatigiit siulittaasuat, Elisa Petersen. “Inuit ataqatigiilersitsisoraavut inuttut naleqartitavut; inussiarnersuuneq, ammasuuneq, aamma ikiuukkumatuujuneq”

Kalaallit Nunaanni akerliusut assigiinngisitaartuupput

Qaamasuugaluarutta taarnerugaluaruttaluunniit, tamatta naligiippugut.

Inuiaassutsit assigiinngitsuuppata, tamatta naligiippugut. (Nuummiinnaq paasissutissat pissarsiffiusut naapertorlugit ikinnerpaamik assigiinngitsunik inuiaassusillit 35-upput).
Oqaatsit ilitsoqqussavut assigiinngitsuuppata, tamatta naligiippugut. 
Kinguaassiutit atornerat assigiinngitsuuppata, tamatta naligiippugut. 
Assigiinngitsunik upperisaqaraluarutta guutsiitsuugaluaruttaluunniit, tamatta naligiippugut.
Ilinniarsimasuugaluarutta ilinniarsimasuunngikkaluaruttalluunniit, tamatta naligiippugut.
Politikkikkut isummersornivut assigiinngitsuuppata, tamatta naligiippugut. 
Inuit ersittunik ersinngitsunilluunniit innarluuteqarpata, tamatta naligiippugut. 
Illoqarfimmiuugutta nunaqarfimmiuuguttaluunniit, tamatta naligiippugut. 
Aappariittut qanorluunniit inissisimagaluarutta, tamatta naligiippugut. 
Anaanaqanngikkaluarutta ataataqanngikkaluaruttaluunniit tamatta naligiippugut.

Kalaallit Nunaanni Naligiissitaanissamut Siunnersuisooqatigiit Arny Koor Mogensenimik suleqateqarnermikkut inuit assigiinngitsut naligiinneq pillugu sulissutiginninnerminni #Naliga-p Naligiissitaanissamut Siunnersuisooqatigiit facebookikkut qupperneranni, malinnaaffigineqarsinnaasumi saqqummiussorneqarput.

#Naliga atorlugu, Kalaallit Nunaanni assigiinngisitaartuuneq takutinniarlugu, inuit imminnut assilillutik takutitsinissaannik kaammattorneqarput.

Assit ataani takukkit. Asseq arlaat toorukku allissaaq, assillu quppeqattaarlugit isiginnaarsinnaavatit: