Tuku aamma Mala

Kalaallit Nunaanni Naligiissitaamissamut Siunnersuisoqatigiit aamma Meeqqaat Inuusuttullu Oqaloqatiginnittarfiat MIO suleqatigiillutik meeqqanut atuakkiorput taallugu Tuku & Mala, tassani qitiutinneqarluni naligiissitaaneq meeqqallu pisinnaatitaaffii meeqqanit isigalugit.

Meeqqanut atuagaq saqqummiunneqarpoq Meeqqat Pisinnaatitaaffii Pillugit Isumaqatigiissutip ukiunik 25-nngortorsiorneranut atatillugu, novemberip 20-anni 2014, meeqqanullu atuarfimmi klassini minnerniittunut, meeqqerivinniittunut, ulluuneranilu paaqqinnittarfinniittunut tunissutitut tunniunneqarluni.

Naligiissitaanissamut Siunnersuisoqatigiit MIO-lu isumaqarput meeqqat meeqqatut pisinnaatitaaffitik pillugit ilisimasaqalernissaat naligissitaanerullu qanoq paasisariaqarneranik aamma ilisimasaqalernissaat.

Atuakkap meeqqat ataasiakkaat eqqarsalersinniartussaavai periarfissiillunilu ikinngutigiinnerup naleqarneranik peqatigiilluni oqaluuserinninnissaq, naak meeqqatut assigiinngissuseqaraluarluni.

”Anguniagaavoq suiassuseq apeqqutaatinnagu assigiinngissutsit inissaqartinnissaat. siunertaavoq meeqqat meeraasinnaanissaat assiginngissuteqarsinnaanissaallu, suiaassuseq apeqqutaatinnagu. Naligiissitaaneq tassaavoq meeqqat ataasiakkaat periarfissinnissaat namminneq iliuuseqarnissaannut ineriartornissaannullu, qangatut eqqarsarluni nukappiaqqat niviarsiaqqallu susinnaanerannik, susussaanerannik qanorlu iliortussaanerannik eqqarsaatinit killilersorneqaratik. Ilumoorluni oqartoqarsinnaanngilaq niviarsiaqqat nukappiaqqallu qanoq ittuusussaasut”, Kalaallit Nunaanni Naligissitaanissamut Siunnersuisoqatigiinni siulittaasuugallartoq, Josef Therkildsen, oqarpoq.

Atuakkap naggataani qulequttat oqaluuserineqarsinnaasut ilanngunneqarput, taamaalillusi inersimasut meeqqallu atuakkami sammineqartut oqaluuserinissaannut periarfissaqarniassammata.