Naligiissitaanermik Siunnersuisoqatigiit digitalikkut kanngutsaatsuliornerit pillugit aaqqississuussinerannut nalunaarusiaq
Njord Law Form suleqatigalugu
Ilisarititsineq
Novembarip 25-t 2024 nunarsuaq tamakkerlugu arnanut nakuusernerup atugaajunnaarnissaanut ulloritinneqarpoq, tassungalu atatillugu Naligiissitaanermut Siunnersuisoqatigiit qulequtaq pillugu Katuami ammasumik akeqanngitsumillu aaqqissuussipput.
Aqaguani novembarip 26-ani 2024 suliassaqarfimmi sulisut assigiinngitsut oqalugiarnissamut oqallinnissamullu qaaqquneqarput.
Aaqqissuussinerni marluusuni Miriam Michaelsen oqalugiarpoq, suleqataalu Njord Law Firmimeersut suliassaqarfimmi annertuumik misilittakkaminnik ingerlatitseqqiiniarlutik Nuuliarsimapput.
Tamatuma saniatigut Kalaallit Nunaanni Politiit pinerluttulerisui peqataapput, politiillu suliassaqarfimmi ilisimasaminnik iliuuserisarsimasaminnillu oqaluttuarlutik.
Naligiissitaanermik siunnersuisoqatigiit | Katitigaanerat periusissiaallu
Kalaallit Nunaanni Naligiissitaanermut Siunnersuisoqatigiit aaqqissuussani marlunni Nuummit novembarip 25-ani 26-anilu ingerlanneqartuni qaaqqusisuupput.
Kalaallit Nunaanni Naligiissitaanermut Siunnersuisoqatigiit maannakkut ukuninnga ilaasortaqarput:
- Siulittaasoq Britta Keldsen
- Rasmune Geisler
- Grethe Siegstad
- Mikkel Andreassen
- Sofus Fenger Hove
- Erni Kristiansen
Siulittaasoq Britta Keldsen aaqqissuussinerni marlunni peqataavoq.
Digitalikkut kanngutsaatsuliornerit Naligiissitaanermik Siunnersuisoqatigiit 2023-miit 2026-mut periusissiaasa ilagaat. Periusissiornermi siunertaavoq suliassaqarfinni kinguliani allassimasuni taakkulu digitalikkut kanngutsaatsuliornerup iluani ilisarnaatalu immikkut ittut pillugit ilisimasanik siammarterinissaq
- Kinguaassiuutitigut innarliineq
- Naapertuutinngitsumik assinik videonillu saqqummiineq
- Malersuineq
- Inatsisaatsuliorluni assiliineq videoliornerlu
Oqalugiartinneqartut naatsumik
Miriam Njord Law Firmimi eqqartuussissuserisuuvoq digitalikkut kanngutsaatsuliorneq, nakuuserneq pimmatiginninnerlu pillugit immikkut ilisimasalittut siuttut ilaattut isigineqartoq. Suliassaqarfiuvoq ineriartortuartoq taamaattumillu kanngutsaatsuliornerit taamaattut suliarineranni eqqugaasut qanigisaasullu ikiorniarneranni immikkut ilisimasaqarlunilu piginnaaneqartariaqarpoq.
Miriam ukiorpassuani kingullerni – suleqatigiit tunniusimasut allat peqatigalugit – digitalikkut kanngutsaatsuliorfigineqarsimasunik ikiuuttarpoq – inatsisilerinermi soorlu eqqartuussiveqarnikkut qanoq iliornissamik ilitsersuinikkut eqqartuussinerillu ingerlanneqarneranni ikiuinikkut, saniatigulli Miriam suleqataalu ikiuullutillu siunnersuisarput suliani taamaattuni pinerliivigineqartut digitalikkut teknikkikkullu pisuni ilungersunartorsiortut pineqartillugit.
Tamatuma saniatigut Miriam Meeqqat Inuusuttullu pillugit tusagassisarnikkut siunnersuisoqatigiinni siulittaasuuvoq, taakku inuiaqatigiinni digitaliusuni toqqissisimanissaat, isumannaatsuunissaat akisussaassuseqartumillu inuusinnaanissaat siunertaralugu, Danmarkimmilu naalakkersuisut big-techimi immikkut ilisimasalittut suleqatigiissitaani issialluni kiisalu allarpassuartigut siunnersuisuutitaniilluni.
Miriamip suleqatimi ilai Nuuliaqatigai, ilaatigut digitalikkut kanngutsaatsuliortoqarsimatillugu digitalikkut paasiniaaneq eqqartuussivilersuussinerlu pillugit ikiuullutik. Suleqatigiiupput Christian Skettrup, digitalimik paasiniaasartoq, Lars Lokdam, eqqartuussissuserisoq piginneqataasorlu kiisalu Clara Lou eqqartuussissuserisoq.
Aaqqissuussinerup siunertaa
Aaqqissuussinerni siunertaavoq digitalikkut kanngutsaatsuliornerit pillugit paasisanik siammarterinissaq kiiisalu matumani suliaqartut nalinginnaasumillu inuiaqatigiit tigussaanerusunik sakkusaqarnissaat, meeqqat inuusuttullu digitalikkut kannguutsaatsuliorfigineqarsimasut illersorlugillu ikiorniarlugit.
Isumaginninnerup iluani, tusagassiuutini, atuarfinni, ingerlatsivinni namminersortuni, politiini pinerluttunillu isumaginnittoqarfimmi, sullissisuni peqqinnissakkullu sulisuni susassaqartut assigiinngitsut katersornerisigut periarfissaqalerpoq digitalikkut kanngutsaatsuliornerit pillugit ilisimasanik siammarterinissaq inunnut assigiinngitsorpassuarnut meeqqanik inuusuttunillu attaveqartartunut kiisalu misilittakkanik – pitsaasunik pitsaanngitsunillu – paarlaateqatigiinnissamut periarfissaqalerluni meeqqat inuusuttullu eqqugaasimasut imaluunniit digitalikkut kanngutsaatsuliorfigineqarnissaminnut suli aarlerinartumiittut, pitsaanerusunik illersornissaannut suleqatigiinnerup nukittorsarnissaa siunertaralugu.
Digitalikkut kanngutsaatsuliorneq – ”Eqqornaveeqqut”
Novembarip 25-ani 2024-mi Nuummut tamarmut aaqqissuussineq ammasoq
Novembarip 25-ani 2024-mi Miriam suleqataalu ammasumik aaqqissuussipput digitalikkut kanngutsaatsuliorneq pillugu saqqummiillutik. Takkussimasut digitalikkut kanngutsaatsuliorneq pillugu ilimasarpassuarnik pissarsipput kiisalu silarsuaq digitaliusoq meeqqanut inuusuttunullu qanoq navianartigisinnaanersoq paasinerullugu.
Saqqummiinerup ilaattut Miriamip ”eqqornaveeqqut” sunaanersoq nassuiarpaa. Eqqornaveeqqutip siunertaraa assigiinngitsunik sulisoqartoq digitalikkut innarliisoqarsimatillugu, sioqqullugu pineranilu qanoq meeqqaat inusuttullu illersorneqarnissaannik sulisinnaanersut.
Aaqqissuussineq naggaserlugu oqallittoqarpoq apeqqarissaarnermilu akisartoqarluni, Kalaallit Nunaanni tusagassiivinnit aamma peqataasoqarluni. Qulequtarineqarpoq inuit attaveqaqatigiittarfiini oqallinneq silaannarlu oqalliffiusoq qanoq ittuunersoq ilaatigut nutaarsiassat il.il. saqqummiunneqarneranni, ilaatigut tusagassiiviit inissisimanerat akisussaassuserlu. Oqallinnermi aamma digitalikkut kanngutsaatsuliorneq tikinneqarpoq tusagassiortut allallu inuiaqatigiinni oqallinnermi nalaassinnaasaat, kiisalu qanoq tusagassiorfiit allallu assigiinngitsunik iliuuseqarnikkut illersorneqarsinnaanersut.
Novembarip 26-ani 2024-mi sulisunut aaqqissuussineq
Novembarip 26-ani sulisunut aaqqissuisoqarpoq. Peqqinnissaqarfimmiit, atuarfeqarfimmiit, politiinit, isumaginnittoqarfinnit allaniillu meeqqanik inuusuttunillu digitalikkut kanngutsaatsuliorfigineqarsimasunik suliaqartunik aggersaasoqarsimavoq.
Aaqqissuussinermi tassani Miriam suleqataalu digitalikkut kanngutsaatsulorneq pillugu soqutiginartumik saqqummiipput. Maannakkut peqataasut amerlanersaat ”eqqornaveeqqummeersut” saqqummiinermilu peqataasut inuusuttut silarsuarmi digitaliusumik onlinemi inuunerannik navianarsinnaasunillu paasitinneqarput kiisalu suut tassunga atatillugu navianarsinnaanersut, inuusuttut digitalikkut kanngutsaatsuliornermi nalaassinnaasaat, inuusuttullu ikiornissaannut sakkussat tigussaasut suusinnaanersut.
Inatsisitigut inissisimanerit unioqqutitsinerillu pillaanermik kinguneqarsinnaasut pineqaatissiissutaasinnaasullu suunersut pissutsit piviusut silarsuaaneersut assersuutigineqarput, Miriamip suleqataasalu sulinerminni nalaattagaat. Assersuutit tigussaasut peqataasunut takussutissaapput kanngutsaatsuliornerpassuit ilaat pissutsit piivusut silarsuaani qanoq ittuusinnaanersut.
Tamatuma saniatigut peqataasut periutsimik arfinilinnik allorneqartumik saqqummiivigineqarput, ”eqqornaveeqqummi” meeqqat inuusuttullu qanoq ikiorneqarsinnaanerannik, takussutissiarineqartutuut.
Oqallinneq alla pingaarutilik pisariaqartorlu saqqummiunneqartoq soorunami tassaavoq digitalikkut ileqqorissaarnissaq kiisalu meeqqanut inuusuttunullu killissat suunersut pillugit apeqqut. Meeqqat inuusuttullu misigisamik nuanniitsut kanngutsaatsuliornerillu angajoqqaaminnut oqaatigisannginnerannut peqqutaasut ilagaat pillarneqarnissamik siioraneq – tassalu taammaallaat inuit attaveqaqatigiittarfiini taamaalillutillu inoqatigiiaat akuuffigisamik akornanni. Tamatuma saniatigut apeqqut saqqummersoq tassaavoq kikkut imarisaasut ajortuunerannut akisussaanersut, meeqqat inuusuttullu tamakkuninnga nalaataqannginnissaanut qulakkeerisussaatut.
Politiit aamma najuupput, ilaatigullu nassuiaapput digitalikkut kanngutsaatsuliornerit pillugit suliani tigussaasuni qanoq ikiuisoqarsinnaanersoq iliuuseqarnerni imaattuni:
- Ilitsersuineq
- Kanngutsaatsuliortumikassuarinninnermi
- Ingalassimasussaaneq
- Unioqqutitsisoqartillu paasiniaaneq immaqalu inatsisitigut malersuineq
Politiini suleqatigiit immikkut piukkunnarsarsimasut nassuiaapput, ilaatigut malersuinermik suliani assigisaannilu kanngutsaatsuliornermi paasissutissanik katersuisoqartassasoq, politiit suliap misissornissaanut atugassanik.
Peqataasut misilittakkaminnik paarlaaateqatigiipput kissaatigalugulu atuarfeqarfinniit isumaginnittoqarfinnut politiinilu susassaqartut angajoqqaallu pikkorinnerulertariaqartut suleqatigiinnissamut meeqqat inuusuttullu digitalikkut kanngutsaatsuliorfigineqarnissaasa illersornissaannut.
Aaqqissuussinernit pissarsiat
Ulluni marlunni pitsaasorpassuarnik saqqummiisoqarpoq, ilisimasanik paarlaateqatigiilluni, oqaluguartunut apeqquterpassuullutik isummersuutillu.
Naligiissitaanermik Siunnersuisoqatigiit ulluni makkunani aaqqissuussanit imaattunik pissarsiaqarput atorneqarsinnaasunik:
- Digitalip silarsuaani kanngutsaatsiliornissamut aarlerinartut silarsuarmit tigussaasumit allaanerusunik.
- Digitalip silarsuaani meeqqat inuusuttullu mianernarnerupput, angajoqqaaminnit allaniillu inersimasunit avatangiisaaniittunit takorloorsinnaasaatsinniit nuanniitsunik kanngutsaatsuliorfigineqarnissamullu qaninnerujussuullutik.
- Meeqqat inuusuttullu nalinginnaasumik arlaanik inuit attaveqaqatigiittarfiini assigisaannilu nuanniitsunik kanngutsaatsuliornernillu nalaataminnik angajoqqaaminnut oqaatilliineq ajorput, taamaattumillu pingaartuulluni angajoqqaanik eqqornaveeqquteqarnissaq, meeqqat inuusuttullu pisuni mianernaqisuni saaffigisinnaallugillu tatigisinnaasaannik.
- Digitalip silarsuaa ineriartortuarpoq, meeqqat inuusuttullu ”kanngutsaatsuliorfiginissaannut” nutaanik periutsinik nassaartuartoqartarmat. Taamaattumik pingaartuuvoq, angajoqqaat allallu inersimasut – soorlu atuarfinni – ilisimassagaat meeqqat onlinemi susarnersut, suullu immikkut maluginiarneqartariaqarnersut, kanngutsaatsuliorgineqarnissamut, kiisalu iliuutsit suut digitalikkut kanngutsaatsuliornerunersut.
- Digitalikkut kanngutsaatsuliornerit sukkasuupilussuamik allanngoriartortarnerisigut paasiniaanissaq inatsisitigullu malitseqartitsinissaq ajornakusoornerujartorpoq ilaatigut paasiuminaattarmat kanngutsaatsuliorneq qanga pisimanersoq kingornalu internetimi siammarternissaa unitsillugu – pineqartarpullu inuit kanngutsaatsuliorfigineqartut ilisarisimasaat kiisalu attaveqaatini annertuuni inuit ilisarisimanngisat.
- Videot assillu ingerlateqqinnissaannut periarfissarpassuit peqqutigalugit kanngutsaatsuliornerit unitsikkuminaassinnaapput, eqqugaasorpassuillu malugisarpaat kanngutsaatsuliorfigineqartuarlutik taakku ingerlateqqinneqarnerisigut. Tamanna ingammik meeqqanut inuusuttunullu mianertartunut inoqatigiillu akornanniiittariaqartunut mianernartarput. Ajornerpaamik pisoqaraangat kanngutsaatsuliornerit peqqutigalugit imminut ajoqusertoqarsinnaasarpoq imminullu toqulluni.
- Pingaarnertut oqaatiginiarneqarpoq tassaavoq pingaarluinnartuusoq eqqornaveeqqutaasuni assigiinngitsuni inersimasut piffissaq eqqortoq atorlugu eqqumaasumik sullissinissaat – tassalu matu matutinnagu inuusuttullu killinniarnera ajornarsilluni.
Aaqqissuussinerup kingornagut periarfissaqarpoq peqataasunut ullormi sammisat pingaartut pillugit oqaloqatigiinnissamut, kiisalu oqalugiartunut apeqquteqarluni misilittakkanillu paarlaateqatigiinneq pingaartupilussuaq nangissallugu.
Siulittaasup naliliinera naggasiinerlu
Piffissami 2023-2024-mi Naligiissitaanermik Siunnersuisoqatigiinnut pingaartuusimavoq paasissutissanik katersillunilu ingerlatitseqqiinissaq sapinngisamik annertunerpaamik, suliassaqarfinni suliarisatsinni. Isumaqarpunga aamma maannakkut aaqqissuussinitsinni tamanna iluatsittoq, nuannaarutigeqaaralu Siunnersuisoqatigiit suleqatiginissaannut piumassuseqarneq peqataasunit takutinneqartoq – tassunga atatillugu soorunami ingammik Kalaallit Nunaanni Politiit. Maanngaaniit qujanarujussuaq.
Soorunami neriuutigaarput aaqqissussinitsigut digitalikkut kanngutsaatsuliornerit saqquminerulersissimassagipput, suunersut paasillugit, qanoq sunniuteqartarnersut, qanoq akiorneqarsinnaanersut, inatsitigullu sunik periarfissaqarlunilu aporfissaqarnersoq.
Naligiissitaanermik Siunnersuisoqatigiit sinnerlugit innnuttaasut, immikkut ilisimasallit, naalakkersuinermik suliallit allallu aaqqissuussinitsinni peqataasut qamannga pisumik qutsavigaakka.
Britta Keldsen
Kalaallit Nunaanni Naligiissitaanermut Siunnersuisoqatigiinni siulersuisoq 2023-2024