Kalaallit Nunaanni Naligiissitaanissamut Siunnersuisoqatigiit piffissami 2023-2026 naligiissitaanermi siuarsaajumallutik sammisassat ukua sisamat ukkatarisassatut toqqarsimavaat:

1. Suiaassuseq aallaavigalugu persuttaasarneq
2. Suliffeqarfinni naligiissitaaneq
3. Assigiinngisitsineq
4. Digitalimik kanngutsaaliortarnerit

Siunnersuisoqatigiit sammisat toqqakkat ukkatarinninnikkut, oqallitsitsinikkut, politiskiusumik suliallit kajumissisinnerisigut akuersinngivinnerullu qulakkeerinninneratigut aallutissavaat.

Siunnersuisoqatigiit assersuutigalugu attuumassuteqartut kattuffii, politiit, universitetit assigisaallu suleqatiginerisigut sammisat aallutissavaat. Paasissutissanik ilisimasanillu katersinikkut, ilanngutassianik saqqummiussinikkut, paasissutissiinikkut aaqqissuinikkullu. 

Siunnersuisoqatigiit suliassamut pilersaarusiussapput piffissap sammisallu iluini, ukiullu ingerlanerani arlaleriarlutik naapittassallutik. Sammisat immikkut pilersaarusiussapput, taamaasilluni periusissap malinnera qulakkiissalluni.