Ilisarnaat

Isuma nutaaq – periaaseq nutaaq

Kalaallit Nunaanni Naligiissitaanissamut Siunnersuisoqatigiit nutaamik ilisarnaatitaarput nutaamik oqariartuutitalimmik, tunngaviliullugu ”Isuma nutaaq – periaaseq nutaaq”.

Ukiut qulikkaat kingullit ingerlanerini inuiaqatigiit inuttut atukkamikkut kulturikkullu mikinngitsumik allanngoriartorsimapput, tamatumalu suliffeqarfiit, ulluinnarni inuuneq, namminiussuserput, kinaassuserput immitsinnullu attaveqatigiinnerput sunnersimavaa allanngortillugulu.

Allannguutit ilaatigut kingunerisimavaat qanga ileqqorisimasatta pissusilersuutigisarsimasattalu ineriartoqqinnerat allanngornerallu.

Naligiissitaanissamut Siunnersuisoqatigiit arlalissuarnik unammilligassaqalerput, pingaartumik qanga eqqarsartaatsitsinnut malittakkatsinnullu sunniuteqartunik.

Allanngornerit tamakku aammattaaq Naligiissitaanissamut Siunnersuisoqatigiinnut, inuiaqatigiit ineriartornerannut sunniuteqaqataajumaalluni ukiortaamiilli suliniuteqarsimasumut, atuuppoq. Tamatuma kingunerisimavaa siunnersuisoqatigiit imminnut paasinninnerata eqqarsaatigeqqinnissaa, tamatumalu kinguneraa nutaamik, ullumikkumut naleqquttumik peqataasumillu suliniaqatigiiffiunissaanik isummerneq, tassaassalluni Nunatsinni naligiissitaanissamut suliniuteqarnermi soqutiginninnerunermik peqataanerunermillu siunertalik.

Siunnersuisoqatigiit kissaatigaat ullumikkumut naleqqunnerusumik imminnut isiginerminnik takutitsinissartik, kissaatigalugulu inuiaqatigiit assigiinngitsunit nutaanit qiviarfilerlutik isiginnillernissaat, tassami naligiissitaaneq angutit arnallu akornanni naligiissitaaneranniiginnarani annertunerujussuummat. 

Ilisarnaat

Ammalortup takutippaa inuunerup allanngorartuarluni ingerlanera, tassanilu inuiaqatigiit inuup sianissuseqarneratulli uumassuseqarnerat.

Ammalortup iluani ammalortut takutippaat inuit assigiinngitsunik angissuseqarlutillu, qalipaateqarlutillu iluseqarnerat. Tamarmik kikkulluunniit inissaqassapput, kikkulluunniit periarfissanut pisinnaassuseqartinneqassapput, apeqqutaatinnagu suiaassuseq, sumit naggueqarneq, kikkunnit kingoqqisuuneq, naalagaaffimmit sorlermeerneq, upperisaq,upperuseq, innarluuteqarneq, utoqqaassuseq atoqateqartarnikkulluunniit sorlernut kajungerneq apeqqutaatinnagit. Taakku tamarmik ataatsimoorutigaat tamarmik inuugamik.