Juulli ukiorlu nutaaq nalliutilerput
Juulli ukiorlu nutaaq nalliutilerput, taamaattumik ukiup ingerlanerani pisut killiffissiussallugit piffissaalluarpoq.
Ukiumi kingullermi Naligiissitaanissamut Siunnersuisooqatigiit nutaat ataatsimoortinneqarput.
Qaanaamiit, Nuummiit, Paamiuniit Qaqortumiillu siunnersuisooqatigiinni nutaanik ilaasortaatitaqalerpugut.
Ininut nutaanut iserterpugut, nutaamik nittartagartaarpugut minnerunngitsumillu ukiunut tulliuttunut pingasunut nutaanik pissanganarluinnartunillu suliniutissaqalerluta. Suliniutit suunerinik ilissinnut saqqummiussinissamut qilanaarpugut aamma ukiumi nutaamiit aallartinnissaannut qilanaalereerluta.
Naligiissitaanissamut tunngatillugu suliaqarneq ukiut 20-t sinnerlugit maanna ingerlareerpoq, ukiorlu 2019-imi naligiissitaanissamut tunngatillugu inuiaqatigiinni ajornartorsiutigisartakkavut suliassavullu killiffissiornerinut naligiissitaanissamut siunnersuisooqatigiinnit suliarineqarsimallutik.
- Ukiuni kingullerni qulikkaani inuuniarnikkut kulturikkullu allannguisoqarnerujussua inuiaqatigiinnit misigineqarpoq.
- Angutit arnallu amerlaqisut inuunermi atugaat pitsaanerulersimapput, kisianni kikkut tamarmik taamatut atugaqanngillat.
- Angutit arnallu naligiinnerulernissaannut suli naligiissitaanermut tunngasunik iliuuseqarfigisariaqakkatsinnik ajornartorsiuteqarpugut.
- Ukiorpassuarni suliaqaraluarluta arnaaneq angutaanerluunniit peqqutaalluni uteqqiattumik persuttaasarnerup unitsinnissaa ajornakusoortuusoq takusinnaavarput, aamma pinaasersumut arneriniarnerup nipangiusimaannarfigiunnaarnissaa qanoq ajornartiginersoq takoreerparput.
- Ukiut ingerlanerini pisuut piitsullu assiginngissusaat ersarinnerulersimavoq.
- Internetsikkut inuit naapittarfiisigut oqallinneq sakkortusisimavoq.
- Assigiinngisitsineq ajornartorsiutaavoq angisooq, aamma tamanna pillugu inatsit amigaataavoq.
Angutit arnallu akornanni naligiissoqalernissaanut kikkulluunniit nukissaqartut suleqataanissaat amigaataavoq. Naligiissitaaneq nammineerluni takkunneq ajorpoq.
Pisariaqartinneqarput
- Politikkikkut iluarsiissutissat
- Naligiissitaaneq pillugu ajornartorsiuteqarnermi namminersortut suleqataanissaat
- Suliffeqarfiit naligiissitaanermut ersarissumik isummersimanissaat
- Ilinniarfeqarfiit ilinniartitaanerni tamani naligiissitaaneq qulequtanngortissagaat
Aamma ILLIT amigaatigineqarputit, angutit arnallu akornanni naligiinnginnerup allanngortinnissaa illit peqataaffigissavat!
Tamanna anguniaraanni ilungersuutigisariaqarpoq, naammagittartariaqarpoq assoroorutigisariaqarporlu. Kisianni peqatigiilluta allannguisinnaavugut. Allannguinissaq pisariaqartoq peqatigiilluta angusinnaavarput.
2020-mi naligiissitaanerup politikkikkut eqqummaariffigineqarnerussasoq kissaatigaara.
Ukioq qaangiuttoq pillugu qujavunga. Aamma oqallinnerni siunnersuuteqartarnitit pillugit qujavunga.
Qanortoq juulli ilinnut eqqissinartuuli, takorluukkavillu angunissaannut ukioq nutaaq qaninnerulersitsigili.