Periusissatut pilersaarut 2019-2022

Periusissatut pilersaarut 2019-2022

Siulequt

Naligiissitaanissamut Siunnersuisoqatigiit aalajangerpaat piffissami tamatumani pingaarnertut qulequtaq “Naligiinneq naligiinnissamut tunngavissaavoq” najoqqutarineqassasoq.

Siunnersuisoqatigiit inuit tamarmik naligiinnerinik tunngaviusumik isuma, tassa suiaassutsit, ammip qalipaataa, oqaatsit, timikkut tarnikkullu piginnaasat, ilinniagaqarsimaneq pissutsilluunnit allat apeqqutaatinnagit sulipput. Atugassarititaasut tamakku akuerineqarpata, aatsaat naligiinnissaq pillugu sulineq siunertaqartutut issaaq. Inuttut naligiikkaanni, assigiinnik pisinnaatitaaffeqarlutalu atugaqartariaqarpugut, tassa Naligiissitaanissamut Siunnersuisoqatigiinni sulinermi qitiusoq.

Periusissiatut pilersaarut una naapertorlugu 2019-imiit 2022-p tungaanut siunnersuisoqatigiit pingaarnersiugaat suliniutaalu siunnersuisoqatigiinnut ilaasortanit akuersissutigineqarneratut aallutarineqassapput. Pilersaarummittaaq Angutit arnallu naligiissitaanissaat pillugu Inatsisartut inatsisaat nr. 3, 29. november 2013-imeersumi allaqqasut assigalugit pisussaaffeqartoqarpoq, aamma suliassaqarfiit siunnersuisoqatigiit suleriaasianni allaaserineqartut malillugit.

Pisinnaatitaaneq

Kalaallit inuiaqatigiinni angutit arnallu naligiinnerulernissaat siuarsarniassallugu Naligiissitaanissamut Siunnersuisoqatigiit inatsit naapertorlugu suliassarivaat. Peqquneqarnikkut imaluunniit nammineq sulianik aallartitaqartarnermikkut naligiissitaanermut tunngasut pissutsit siunnersuisoqatigiinnit misissorneqarsinnaapput.

Naligiissitaanissamut Siunnersuisoqatigiit politikkimut attuumassuteqanngillat taamaalillutik pisortani oqartussaasunut arlaanut attuumassuteqaratik namminnerlu suliniutigisartakkatik ingerlatarisarlugit. Taamaalillutik siunnersuisoqatigiit suliaat politikkikkut anguniakkanit allanit sunnerneqannginnissaat qulakkerneqassaaq.

Siunnersuisoqatigiit:

  • inatsit qanoq atorneqarnersoq inuiaqatigiinnilu qanoq atortitaanersoq pillugu nakkutiginnissapput
  • Naalakkersuisunit apeqquteqaateqartoqartillugu oqaaseqassapput, tak. inatsimmi siuliani taaneqartumi §§ 16 aamma 17, aamma oqaaseqaatit tamanit takusassanngorlugit saqqummiunneqassapput
  • sammisassat paasissutissiisut oqallissaarisullu aallartittassavaat
  • pisortat ingerlatsiviinut suliffeqarfiinullu, suliffeqarfinnut namminersortunut innuttaasunullu siunnersortitut sulissapput

Siunnersuisoqatigiittaaq:

  • pisortani namminersortunilu suliffeqarfinni naligiissitaanissamut sinniisuutitanut ikiuuttassapput
  • oqartussaasunut isumassarsiortassapput siunnersuusiortassappullu
  • arnat angutillu qangatut isigineqartarneri pitsaanngitsut allanngortissallugit paasissutissanik suliaqartassapput
  • pisortat suliffeqarfiutaanik aaqqissuussaannillu arnaaneq angutaanerlu peqqutaallutik annersaasarnernik akiuuttunik suleqateqassapput
  • akissarsiat naligiinnissaat anguniassavaat aamma suliffeqarnermi arnaaneq angutaanerlu peqqutaallutik immikkoortitsinerit ajornartorsiutigineqartut pillugit suliaqartassallutik

Ullut pingaarutillit

8. marsi                                       Arnat nunarsuaq tamakkerlugu ulluat

20. maaji                                     Kalaallit Nunaanni Naligiissitaanermut Ullorititaq

19. novembari                            Angutit nunarsuaq tamakkerlugu ulluat

25. novembari                            Arnat persuttagaasarnerat akiorniarlugu nunarsuaq tamakkerlugu ulluat

Sakkussaasivik

Pissutsit piviusut isummallu atorlugit oqaluuserisaqarnissaq Naligiissitaanissamut Siunnersuisoqatigiinnit anguniarneqassasoq kissaatigineqarpoq. Kalaallit inuiaqatigiinni pissusissamisoortumik oqallittoqarnissaat aamma ilisimasat oqariartuutillu anngussassanut “aqqutit” arlallit aqqutigalugit annguttarnissaat pissasoq siunnersuisoqatigiinnit kissaatigineqarpoq. Paasissutissiinissamut oqaloqatigiinnissamullu periarfissarpassuit akornannit siunnersuisoqatigiinnit assersuutigalugu atorneqartut tassaapput tamanut ammasumik ataatsimiisitsinerit aaqqissuussallu, oqallissaarinerit aammattaaq internettikkut inuit naapittarfiisigut ileqquusumillu nutaarsiassatigut annguttarnerisigut, politikerit peqatigalugit oqaloqatigiilluni ataatsimiisitsinikkut, tusagassiuutitigut nalunaaruteqarnikkut, nittartakkatigut allarpassuartigullu anngussisoqartarpoq.

Siunnersuisoqatigiinnut ilaasortat

Naligiissitaanissamut Siunnersuisoqatigiit arfineq-marlunnik ilaasortaqarput, taakkulu kalaallit aaqqissuussaannit suliffeqarfiinillu assigiinngitsunit innersuussutigineqartarput. Ilaasortatut inassutigineqartut akornanniittumik Naalakkersuisut siulittaasumik toqqaasarput. Piffisami 2019-imi siunnersuisoqatigiinnut ilaasortat tassaapput:

  • Kathrine Bødker (siulittaasoq, 8. Marts-gruppimit innersuussutigineqartoq)
  • Lasarus Mikaelsen (siulittaasup tullia, Angutit Oqaloqatigiittartunit innersuussutigineqartoq)
  • Kitdlak Knudsen (Sulisitsisunit innersuussutigineqartoq)
  • Bodil Kleist Shierbeck (IMAK-imit innersuussutigineqartoq)
  • Toku Oshima (KNAPK-mit innersuussutigineqartoq)
  • Niels Lorentzen (KNAPK-mit innersuussutigineqartoq)
  • Jakob G. Motzfeldt (SIK-mit innersuussutigineqartoq)