Beat – it

Inuusuttut suleqatigiit 14-it 17-illu akornanni ukiullit Kalaallit Nunaanni Naligiissitaanissamut Siunnersuisoqatigiit Pinerlutsaaliuinermut Siunnersuisoqatigiit suleqatigalugit aapparisamut persuttaasarneq akiorniarlugu paasitsiniaaniarput ukiup ataatsip ingerlanerani ingerlasussamik.

Suliniut ”Beat it”-imik taaguuserneqarsimasoq aallartippoq novemberip 25-anni 2014, WHO-p persuttaasarneq akiorniarlugu ullorititaa eqqorlugu.

”Avammut takutikkusupparput aapparisaq ajunngitsoq persuttaanermillu nuannarinninngitsoq qanoq ittuunersoq. Neriuutigaarput saaffiginnissutitsigut inooqatigiinnerminni persuttaasarnermik akuersaarnermik isummersinnaanerat inuiaqatigiinni periaasiusoq pinaveersaartitsisinnaallugu”, inuusuttut nalunaarput.

Inuusuttunik suleqateqarnermi qitiutinneqarput inuusuttut namminneq ilisimasaat, isiginnittaasiat naleqartitaallu, taamaalillutik periarfissinneqarlutik namminneq isumartik malillugu oqariartuutitik inassutitillu inuusuttunut, angajoqqaanut, sullissisunut allanullu ingerlateqqissinnaassallugit.

Inuusuttut pingaartippaat namminneq aapparisatut ajunngitsutut qanoq ittuunermik oqaasertalernissaa, aammalu aapparisatut ajunngitsutut piumasaqaat aapparisamut piumasaqaataannaanngitsoq, kisiannili aamma nammineq qanoq isummernissamut naleqartitsinissamullu pisussaaffiliinerusoq qanoq iliortariaqarnersoq persuttaanertaqanngitsumik ajunngitsumik aappariinissamut.