Coronavirusip atugaanerani tamatta paarisa

Ullut atukkavut nutaajuppput. Nalinginnaanngilluinnartut. Annilaarnartortaqartut. Ulluni atukkatsinni Corona-virusip sakkortoqisup tuniluuttullu kingunerisaanik sungiusimasagut ulluinnagullu allanngorput. Imaaliallaannarluta atisaarniarfimmut pisiniarsinnaajunnaarnerput, nujaleriffiliarsinnaajunnaarnerput, kaffillertunukarsinnaajunnaarnerput imaluunniit eqqartueqatigiissinnaanermut minnerunngitsumillu killiffiup kingunerisinnaasai tamaasa eqqartornissaannut imerniartarfinni kaffisortarfinniluunniit naapisimaarsinnaajunnaarnerput inuttut kiffaanngissuseqarnitsinnut akuersaarnanngitsutut misinnarsinnaavoq.

• Ulluinnarni oqartussanit taamatut killilersorneqartarneq sungiusimasarinngilarput. Nappaat qanoq annertutigilissanersoq aamma inuiaqatigiinnut ilaquttatsinnullu qanoq kinguneqassanersoq naluarput. Naluarput qanoq sivisutigissanersoq, aamma naluarput Corona-virusi nunatta aningaasaqarneranut minnerunngitsumillu inuit ataasiakkaatut aningaasaqarnitsinnut qanoq sunniuteqassanersoq, taama oqarpoq Naligiissitaanissamut Siunnersuisoqatigiinni siulittaasoq, Kathrine Bødker.

Taamatut nalorninartumik inissinnerput tunngavigalugu ilaqutariippassuarnut aningaasaqarnikkut peqqinnissakkullu ernumatitsisoqarpoq, tamannalu imaannaanngitsuusinnaavoq.

• Ulluinnarni ipianngunartutut allanngortutullu misigisarput angerlarsimaffinni qanigisanullu persutaanerulernermik kinguneqaratarsinnaanera annilaanngatigaara. Arlallit nalorninartumik inissinnerput peqqutaalluni sunnertisimasinnaapput uippakajaalersinnaappullu, taamaalillutillu ilaqutariippassuit sungiusaminnut naleqqiullugu atuarfiit matoorarnerisa, angerlartitaasoqarnerisa assigisaannillu peqquteqartut kingunerisaannik piffissarujussuaq atorlugu peqatigiinnerulersinnaalluti, Kathrine Bødker oqarpoq.

Kalaallit Nunaanni Naligiissitaanissamut Siunnersuisoqatigiinnit kaammattuutigineqassaaq tamatta immitsinnut paarilluassasugut. Ilaquttatit, suleqatitit, sanilitit ikinngutitillu qanoq innersut eqqummaariffigissavat. Corona-virusi, aningaasatigut ilungersunartut, nalorninartut nappaammullu annilaangassutit eqqartorsigit. Ipiannguneq ilaquttannut allanulluunniit tutsinnaveersaaruk. Pitsaasorpassuittaaq eqqartorsigit, ikioqatigiigitsi, ilaqutariiullusi sammisaqaqatigiigitsi nuannersullu aallutaralugit.