Ullualunnguit qaangiupput ima oqarfigineqaqqikkama; naligiissitaanissaq pillugu ilungersuuteqarneq angutinik qinngarsuineruvoq. Takutiinnarpaa suli suliassaqangaatsiartugut – naligiissitaanissaq pillugu ilungersuuteqarneq tamaana killeqanngilluinnarpoq! Arnanut tunngassuteqartunik pingaartitsisuuvunga, taamaakkaluartoq angutit qinngarinngilakka!
Naligiissitaanissaq pillugu ilungersuuteqarneq angutinut akerliliisutut isigineqartoq eqqumiigaara. Naligiissitaanissaq pillugu ilungersuuteqarneq uanga ima paasisarpara, nalunngissutsitsigut angutit arnallu pillugit sorsuuteqarneq aamma inuiaqatigiit akornanni assigiimmik naleqartutut naligiittutullu isigineqartussat.
Assigiinngitsuuvugut – aamma assigiinniarsarisussaanngilagut. Angutit, arnat, angutit arnanngornikut aamma arnat angutinngornikut, non-binære il. il. Tamatta qanorluunniit ittuugaluarutta qanoq ittoorusunnitsinnut pisinnaatitaaffeqarpugut – aamma tamatta assigiimmik naleqarpugut. Inuk kinaluunniit arnaanini angutaaniniluunniit piinnarlugu nalikinnerunngilaq. Naligiissitaanissamut ilungersuuteqarneq taamatut siunertaqarpoq.
Eqqarsartariaatsitsinni ileqqorisartakkatsinnilu ajortoq nalilersunngisaannarparput. Kinguaariiaat ingerlanerini ilinniartinneqartut aallaavigalugit eqqarsaativut namminiinnarlusooq atortarpavut. Assersuusiorsinnaavunga; ”Naak nuliat? – ”Meeqqat angerlarsimaqatigivai”. ”Naak uiit?” – ”Meeqqat isumagalugit angerlarsimavoq”. Assigiinngitsigineri eqqumiipput – eqqarsariaatsitsigut suut nalinginnaasuunersut qanoq paasineqarsinnaaneri takutiinnarpaa arnat meeqqat angerlarsimaqatigigai – taamaanngippat ima oqarnavianngilagut angutip “meeqqat isumagigai”. Angutip angerlarsimaqatigigai nalinginnaasuuppat aamma oqaannarsinnaassagaluarpugut “angerlarsimaqatigivai”. Imaannerpa arnap angerlarsimaffiup avataani inuuneqaqqusaanngitsoq angulli inuuneqaqqusaalluni?
Isummakkut pigiliutiinnagaqarneq immitsinnullu pilluta paasisimasaqannginneq naligiissitaanissamut sanngiillisaataapput, ukiullu arlallit kingulliit ingerlanerini misilittakkat naapertorlugit naligiimmik pinissarput nukittorsarlugulu siuarsartariaqartoq paasivarput, taamaalillutami angutit arnallu naligiimmik pineqarnissaat naligiinnissaallu pillugit pisinnaatitaaffii sorsuutigineqarlutik.
Taamaammat assigiimmik naleqartinneq oqallisigissavarput, assigiimmimmi naleqartinneq assigiinnik periarfissanik, pisinnaatitaaffinnik ataqqinninnermillu pilersitsisuummat. Assigiimmik naleqartinnitta takusinnaanerunissaanut pitsaanerulerutta inuiaqatigiinni pitsaasunik kinguneqarsinnaasoq takorloorsinnaavarput. Tassa kikkuugaluaruttaluunniit.
Naligiissitaanissaq pillugu ilungersuuteqartunut akerliusut kikkunuku annilaangagiinnaraat?