Naligiissitaanissamut Siunnersuisoqatigiinnit Inuillu Pisinnaatitaaffii pillugit Siunnersuisoqatigiinnit arnat suliamik imaannaanngitsumik qaqitsinissaminnut sapiissuseqarsimasut, suliffeqarfimmilu arnanik asissuinertaqangaatsiarsinnaasumi arnanik nikassaaneq pillugu eqqartuussinermik ajornaatsuinnaanngitsumik ingerlatsisimasut nersualaarusuppavut tapersersuinitsinnillu apuussiumalluta. Suiaassutsikkut immikkoortitsineq nikanarsagaallunilu tiingaffigineqarneq akiorneqassappatta suliat qaqinneqartarnissaat kinguneqartinneqartarnissaallu pingaaruteqarpoq.

Suliffeqarfiit suulluunniit, aamma politikkimi sulineq, arnanut toqqissisimanartuusariaqarput. Suiaassuseq tunngavigalugu immikkoortitsineq nikanarsagaallunilu tiingaffigineqarneq akuersaarneqanngisaannassapput.

Naligiissitaanissamut Siunnersuisoqatigiinnit Inuillu Pisinnaatitaaffii pillugit Siunnersuisoqatigiinnit politikkimi arnanik nikassaasarnerit nikanarsaallunilu tiingaffiginnittarnerit qaqilertorneqarnerusalernerat nuannaarutigaarput. Siunnersuisoqatigiit Inuit Pisinnaatitaafiinut Institutti peqatigalugu Kalaallit Nunaata Danmarkillu Naalagaaffiit Peqatigiinni arnat pisinnaatitaaffii pillugit ataatsimiititaliami februaarip qaammataani naliliivigineqalerpata Naalagaaffiit Peqatigiinnut oqaaseqarnissaq sulissutigaarput. Naliliivigineqarnissamut immikkut nalunaarusiami politikkimi arnanik immikkoortitsinermik Kalaallit Nunaata akiuinerunissaanik Inuit Pisinnaatitaaffii pillugit Siunnersuisoqatigiit ilaatigut inassuteqaateqarput.

Naligiiissitaanissamut Siunnersuisoqatigiinni siulittaasoq

Kathrine Bødker

Inuit Pisinnaatitaaffii pillugit Siunnersuisoqatigiinni siulittaasoq

Sara Olsvig

Arnat pillugit Naalagaaffiit Peqatigiit ataatsimiititaliaannut immikkut nalunaarusiaq: https://menneskeret.dk/udgivelser/parallelrapport-cedaw-2020-convention-on-the-elimination-of-discrimination-against-women