Kalaallit Nunaanni arnat angutinit akissarsiakinnerusut uppernarsaqqinneqarpoq. 2021-mi 23 %-inik. Naatsorsueqqissaartarfimmit kisitsisit tamanna takutippaat.
Angutit arnallu akissarsiaasa assigiinnginnerat naligiissitaanermi qangalili ajornatorsiutaavoq: sulianut assigiinninnut akissarsiat assigiinnginnerisigut aamma arnat akornanni akissarsiat qaffaataasa akissarsianullu tapit assigiinnginnerisigut. Kissarsiat assigiinnginnerat Kalaallit Nunaanni naligiissitaanermi ajornartorsiutaavoq, tassani angutit arnanit nalinginnaasumik annertunerusumik isertaqartarlutik.
Sulianut assigiinnut assigiimmik akissarsiaqarneq isumaqatigiissutit tunngavigalugit atorfinitsitsisoqaraangat annertuumik qulakkeerneqassaaq.
Misissuinerit tamassuma saniatigut takutippaat, immikkoortuni angutit amerlanerugaangata immikkoortuni arnat amerlaneruffigisaannit qaffasinnerusunik akissarsiaqartoqartartoq. Arnat peqatigitillugu erninermut atatillugu sulinngiffeqarnerusarput angajoqqaatullu sulinngiffeqarnerusarlutik, misissuinerillu takutippaat angutit akissarsiaat qaffakkajunnerusartut akissasianullu tapit qaffasinnerusartut. Ataatsimut isigalugu angutit arnanit soraarnerussutisiaqarnerusarmata tamanna utoqqalinermi aamma sunniuteqarpoq.
Angutit arnallu akissarsiaasa assigiinnginnerat imatut takussusersiorneqarsinnaavoq, arnat angerlarsimaffimmi nalinginnaasumik akisussaaffeqarnerusartut arnallu meeqqat napparsimanerannut atatillugu angerlarsimagajuttartut meerarlu ataaseq inunngoraangat erninermut atatillugu piffissaq sulinngiffigisaat sivisunerusartoq. Taamaammat pissusiviit tassaapput meerartaarneq arnanut akissarsiatigut, suliffimmi qaffakkiartornermut soraanerussutisiaqarnermullu arnanut akisunerusartoq.
Kalaallit Nunaanni suliffiit angutinut arnanullu agguarnikuunerat nutaajunngilaq. Isumassuinermi paarsinermilu atorfinni arnat amerlanerupput, akilerlinillu aqutsisutut atorfinni angutit amerlanerit inissimapput.
Suliffiit angutinut arnanullu agguarnikuunerisa arnat angutillugu suliffinni assigiiaamik agguarsimannginnerat akerlianilli suliaqarfinnut aalajangersimasunut agguarneqarajuttarnerat takutippaa. Arnat angutillu suliaqarfimmi ataatsimi suliassat assigiinngitsut aamma suliarerusunnerusarpaat.
Suliffiit angutinut arnanullu agguarsimanerat angutit arnallu inissisimanissaannik isumaqarnermut atavoq; angutit arnallu suliffinni takussutissaqarnissaat inuiaqatigiinni ilimagineqarpoq.
Arnat angutillug inissisimanerat nalinginnaasoq aamma avaqqussinnaanngilarput, arnat angutilluunniit inuiaqatigiinni qanoq pissusilersortarnissaannik isumaqartoqarneq, assersuutigalugu suliffimmi, ilinniarfimmi il.il. Arnat angutillu inissisimanerisa inuit inummut ataatsimut qanoq ilimasuuteqarnerat takutippaa, tassa niviarsiaraaneq/arnaaneq imaluunniit nukappiaraaneq/angutaaneq pissutigalugu. Angutit arnallu inuiaqatigiinni inissisimerannik nassuiaasiorneq inuiaqatigiit ineriartornerannut qanimut atavoq, assersuutigalugu upperisarsiornermut atassuteqarnermi, sulifeqarfiit ilinniarfiillu aaqqissuussaanerat, kulturikkut kingornussat il.il.
Kalaallit Nunaanni akissarsianik nalinginnaasumik aamma misisueqqissaarnikuunngilagut. Naligiimmik akissarsiaqarnermi pissutsinik misissueqqissaarnissat amigaatigaagut. Kisitsisini kingullerni piffissaq suliffik sulifimmiluunniit suliassat isiginiarneqanngillat, tamannalu ajornartorsiutaavoq. Allannguiniarluta misissueqqissaartariaqarpugut. Angutit arnallu akornanni akissarsiat qaffasissusaasa assigiinnginnerat aaqqiiviniarlugu sunik suliniuteqartoqarnikuuneranik paasissutissanik aalajangersimasunik Kalaallit Nunaanni naligiissitaanermut siunneruisoqatigiit nassaarsinnaanngillat. Tamanna immaqa ilanngunneqartariaqarpoq, assersuutigalugu isumaqatigiissutit isumaqatiginiutiginerini?